سەرۆک لەبەردەم ئاوێنەکەیدا

سەرۆک لە بەردەم ئاوێنەکەیدا:

                                                                                            ئاکۆ قادر

ئەو ڕۆژەى وێنەکانى ئەو لە بازاڕ و کوچەو کۆڵان و مەیدانەکاندا هەڵدەواسران

ئەو لە کونجى ژوورەکەیدا، لە بەردەم ئاوێنەکەیدا وەستابوو 

لە خۆى ڕادەما!

ئەو بەیانیەى شەقامەکانى شاڕ پڕبوون لە هاوار و دروشمى 

ئەو پیاو و ژنانەى ڕوخسارێکى ڕوونیان نەبوو

سەرۆک بەتەنها لە بەردەم ئاوێنەکەیدا قەنى دەکێشا!!

*    *     *

شار خرۆشا

خەڵک هەموو داواى سەرى ئەو شاعیرەیان دەکرد 

خەونى بینیوە منداڵێک بۆتە سەرۆک.

کوچەو کۆڵان و جادەکان بۆنى خوێنیان گرتووە 

کەچى سەرۆک ئەم بەیانییە

 لە بەردەم ئاوێنەکەیدا هەنگوین دەخوا!!

سەرى بڕاوى شاعیرەکە خرایە بەردەم سەرۆک

کەچى سەرۆک هەر توڕەیە

سەرۆک لەبەردەم ئاوێنەکەدا لە خۆى ڕادەما.

شار خرۆشا 

سەرى هەموو شیعرەکانى ئەو شاعیرەیان بڕى و خستیانە بەر پێ ى سەرۆک

کەچى سەرۆک هەر توڕەیە 

لە بەردەم ئاوێنەکەیدا لە خۆى ڕادەما!

هاوشارییان، پیاو و ژنە بێ دەموچاوەکان

سەرى هەموو ئەو ژن و پیاوانەیان بڕى ڕۆژێک شیعرێکیان نوسیووە

کەچى سەرۆک هەر توڕەیە

سەرى هەموو کتێبەکانیان بڕى ..

کەچى سەرۆک هەر توڕەیە

سەرى هەموو گۆرانیەکانیان بڕى ..

کەچى سەرۆک هەر توڕەیە

تا دواجار توڕەیى سەرۆک بەوە نەما

سەرى هەموو ئەو پیاو وژنانەیان خستە بەر پێ ى کە ڕوخسارێکى ڕوونیان هەبوو

سەرۆک لە بەردەم ئاوێنەکەیدا لە خۆى ڕادەما.

*    *     *

هەموو پیاو و ژنە بێ دەمووچاوەکان 

سەرۆکیان خۆش دەوێت

کەچى ئەو لە بەردەم ئاوێنەکەدا لە خۆى ڕادەما.

هاوشارییەکان، ژن و پیاوە بێ دەمووچاوەکان

هەموو ڕۆژێ لە بەردەم ئاوێنەکاندا دەوەستان بۆ ئەوەى سەرۆک ببینن

بەڵام سەرۆک لە بەردەم ئاوێنەکەیدا لە خۆى ڕادەما.

هەموو منداڵانى شار بەیانیان لە قوتابخانە

سرودى بژى سەرۆکیان دەوتەوە

کەچى سەرۆک بەیانى تا ئێوارە لە بەردەم ئاوێنەکەیدا

 لە خۆى ڕادەما!

هەموومان شەوان خەون بە خۆشەویستى سەرۆکەوە دەبینین

کەچى سەرۆک هەر لە بەردم ئاوێنەکەیدا دەنووست 

خەونى بەخۆیەوە دەبینى!!

ئێمە، پیاو و ژنە بێ دەموچاوەکان 

سەرۆکمان خۆش دەوێت

کەچى ئەو 

تەنها خۆى خۆشدەوێت.

14- 9 -2015

هۆنراوه‌ی تر:

شاره‌كان خه‌ریكن به‌ هه‌وایی ته‌نیاى خۆیان ده‌خنكێن

جاری جاران