سلێمانی و شێخ و هەنووکە
سلێمانی و شێخ و هەنووکە
ئاكۆ قادر حەمە
سه‌ره‌تای ساڵانی بیسته‌كان ئه‌و كاته‌ی ماوه‌یه‌كی كه‌می هێمنی پێش زریان و گه‌رده‌لول به‌سه‌ر كاروباری مه‌مه‌له‌كه‌ته‌كه‌ی (شێخ مه‌حمودی حه‌فید)دا گوزه‌ری ده‌كرد، شێخ هه‌ستی كرد به ته‌نیا ناتوانێت كاروباری شانشینی سلێمانی به‌ڕێوه ببات، بۆیه دوای ڕاوێژ، وای به‌باش زانی هه‌مو هه‌فته‌یه‌ك دوای نوێژی هه‌ینی له‌گه‌ڵ ئه‌عیان و موسڵمانان و ڕیشچه‌رمۆكانی سلێمانیدا كۆببێته‌وه، بۆ قسه‌و باس له باره‌ی كاروباری مه‌مله‌كه‌ت.
واته شێخ زانی به‌ڕێوه‌بردنی ناوچه‌ی سلێمانی وه‌ك به‌ڕێوه‌بردنی ته‌ریقه‌تی قادری نییه و پێویستی به به‌رچاوڕونییه، ئەمەش واتە بەسروشتی خۆی، شێخی سلێمانی بڕوای بە قسە و ڕاویژی ئەوانی تر بووە.
جاڕچی جاڕی دا: به بڕیاری مه‌لیكی سلێمانی له‌مه به‌دوا، دوای نوێژی هه‌ینی موسڵمانان و مونه‌وه‌رو ئه‌عیان و ڕیش سپیانی شار بۆ موناقه‌شه و حیوار داوه‌ت كراون، لەباره‌ی ئوموری مه‌مله‌كه‌ته‌وه كۆده‌بنه‌وه و قسه‌و باس ده‌كه‌ن.
بڕیاره‌كه دروست بوو، جاڕچی چاكی فه‌رموو، بۆ به‌ڕێوه‌بردنی سلێمانی پێویستی به عه‌قڵی هه‌مووان هه‌بوو نه‌ك ته‌نیا عه‌قڵی شێخ و ده‌ست و دایه‌ره موته‌مه‌لق و خوهه‌ڵواسینكه‌ره‌كانی، به‌ڵام ئایا به‌ختی كورد باش ده‌هێنێت؟!!
هه‌ینی یه‌كه‌م نوێژ ته‌واو بوو، هه‌مو پیاوماقوڵانی سلێمانی كۆبونه‌وه، شێخ مه‌حمود و ده‌ست و دایه‌ره‌كه‌ی، و زۆر له ڕوناكبیر و پیاوماقوڵ و قسه‌ڕۆشتوه‌كانی سلێمانی، قسه‌و باس له‌سه‌ر ئوموری مه‌مه‌له‌كه‌ت خه‌ریك بوو ده‌ست پێ بكات، له‌پڕ دونیابینكورتێك گوتی: "باشه یا شێخ ده‌گێڕنه‌وه جگه له موسڵمانان خه‌ڵكی دیكه له گیانله‌به‌ره‌كانی دیكه ده‌چنه به‌هه‌شت، كێن ئه‌وانه‌ی جگه له موسڵمانه‌كان له ناو گیانله‌به‌ره‌كاندا خودا ده‌یانخاته به‌هه‌شت؟"
- شێخ ده‌بێت وه‌ڵامبداته‌وه‌‌و فه‌رموی: ئه‌وه‌ی بیستومه دوو ئاژه‌ڵ ده‌چنه به‌هه‌شت، یه‌كه‌میان كه‌ره‌كه‌ی پێغه‌مبه‌ر یونس، دووه‌میان سه‌گه‌كه‌ی ئه‌سحابول كه‌هف!
نازانین كۆی دانیشتوانی مه‌جلیس و ئه‌عیان و پیاو ماقوڵان چۆن بیریان كردۆته‌وه، به‌ڵام یه‌كێك له‌وان كه له هه‌موویان عاقڵتر و بوێرتر بوو، كه‌له‌یی بوو و هه‌ڵێدایه‌وه شتێكی له‌م جۆره‌ی گوت:
- به‌ڕێزان، جەمعی پیاوە شەرفمەندەکانی سلێمانی، بێ حەیایی نەبێت لە ڕووتان، سه‌ری كه‌ره‌كه‌ی پێغه‌مبه‌ر یونس به قنی سه‌گه‌كه‌ی ئه‌سحابول كه‌هف و سه‌ری ئه‌میش به قنی ئه‌و، باشه ئێمه له‌سه‌ر ئوموری میلله‌ت لێره جەمع بویین و كۆبویینه‌ته‌وه یان له‌سه‌ر ئه‌م مه‌وازیعه كه‌م بایه‌خانه، تكایه موشكیلات زۆره‌و ده‌كرێت له‌سه‌ر ئه‌و بابه‌ت و مه‌وازیعانه و ئوموری میلله‌ت موناقه‌شه‌و موجاده‌له‌و قسه بكه‌ین.
وه‌ك دیاره شێخ ته‌ریق بوییه‌وه و قسه‌كه ناخۆش بوو.
ئه‌وه‌ی ڕویدا له‌وه ناخۆش تر، كاتژمێرێكی نه‌برد، ئه‌عیان و پیاوماقوڵان هه‌موویان چونه‌وه بۆ ماڵ و پیاوه بوێره‌كه‌شمان هه‌روه‌ها، به‌ڵام یه‌كێك له چه‌ته‌كانی شێخ دوای كه‌وت و دوای ئه‌وه‌ی له ده‌رگای دا، كچی پیاوه بوێره‌كه ده‌رگای كرده‌وه‌و پیاوكوژیش داوای پیاوه ڕوناكبیر و بوێره‌كه‌ی كردو كچه‌كه‌ی گازی باوكی كرد و هەر لەگەڵ دەرکەوت، ئه‌میش ده‌ست و برد كوشتی...
شار خرۆشا، شێخ (توڕه بوو) و سوێندی خوارد بكوژ به فه‌رمانی ئه‌و، ئه‌و پیاوماقوڵه‌ی نه‌كوشتوه و به‌ڵێنیدا كه به سزای خۆی بگه‌یه‌نێت...
پیاوكوژ هه‌رگیز سزای به‌ده‌ستی شێخ نه‌خوارد و كه‌سیش نه‌یزانی ئایا شێخ فه‌رمانی كوشتنی داوه یان نا؟!
به‌ڵام یه‌ك شت ڕوونه، شێخ و ئوموره بێ سه‌روبه‌ره‌كه‌ی و مه‌مله‌كه‌ته‌كه‌ی له‌به‌رده‌م زریاندا بوون و دوای سه‌د ساڵ هێشتاكه‌ش هه‌ر له‌به‌رده‌م زریان و گه‌ردلولدایه، دوای شێخ به په‌نجا شه‌ست ساڵ به سه‌ده‌ها هه‌زار له نه‌وه‌كانی مه‌مه‌له‌كه‌ته‌كه‌ی شێخ سه‌ربڕان و كوژران و عه‌زیه‌ت دران...
له‌وه‌ته‌ی ئه‌و پیاوه بوێر و قسه له‌ڕووه كوژراوه، سلێمانی له‌نێوان قسه‌ی ڕاست و گفتوگۆی دروست و قسه‌ی موته‌مه‌لق و قسه‌ی ماستاوچییه‌كان و پیاهه‌ڵدان و هتد، ماخۆلانیه‌تی.
بۆ به‌ڕێوه‌بردنی سلێمانی و كوردستان پێویستمان به قسه‌یه‌كی عه‌قڵانی تر هه‌یه كه خه‌ڵكی دونیابینی گه‌وره‌تر به‌شداربن شتێك واوه‌تر بن له گوتارو قسه بێ مه‌عناكان.
چۆن كۆمه‌ڵگه‌یه‌كی باش و به‌هێز و سه‌ركه‌وتو و دادپه‌روه‌ر و دیموكرات و مرۆیی بونیاد ده‌نێین؟!
کۆمەڵگایەک ئەخلاق ڕەچاو بکات، بەهێزەکان لاوازەکان نەخۆن.. خوانی سلێمانی و کوردستان بەیەکسانی هی منداڵەکانی هەموومان بێت.
كۆمه‌ڵگه‌یه‌ك ژیانێكی شه‌رفمه‌ندانه بڕه‌خسێنێت بۆ هه‌ژاره‌كان و ژنان و منداڵان و كه‌مئه‌ندامان و لاوازه‌كان، كۆمه‌ڵگه‌یه‌ك ته‌نیا كۆمه‌ڵگه‌ی بازرگان و خاوه‌ن میلیشیا و شێخ و ده‌ستڕۆشتوه‌كان نه‌بێت... به‌ڵكو پێش هه‌مووان كۆمه‌ڵگه‌ی هه‌ژارو ژنان و منداڵان بێت.
ئێمه بۆ به‌ڕێوه‌بردنی وڵات پێویستمان به نموونه‌ی له چه‌شنی ئه‌و پیاوه‌یه كه نه‌یانهێشت باسی ئوموری ڕاسته‌قینه‌ی میلله‌ت بكات و كوشتیان.
٭٭
تێبینی: ئه‌م بابه‌ته له ١٦ی ته‌مووزی ٢٠٢١ له ماڵپه‌ڕی ئاوێنه بڵاوبۆته‌وه.
٭٭
وتاری دیكه.......
کورد و مەسەلەی فەلەستین، دوای پەنجاو چوار ساڵ لە گۆڤاری ڕزگاری
جەنگی حه‌ماس-ئیسرائیل وه‌ك وانه‌یه‌كی ترسناك
لە نامۆبوونەوە بۆ تیرۆر: مەترسیەکانی "مه‌شغه‌ڵی ڕێی" سەید قوتب
Comments
Post a Comment
سوپاس بۆ سه‌رنجه‌كه‌ت و بۆ ده‌وڵه‌مه‌ندكردنی بابه‌ته‌كه.......